लम्की जेसीजको आयोजनामा आमपानी पर्यटकीय क्षेत्रमा सरसफाई तथा डस्टबिन राख्ने कार्यक्रम शनिबार सम्पन्न भएको छ । आमपानी पर्यटकीय क्षेत्रसँगै पिकनिक स्पोर्टको रुपमा चिनिएको आमपानी सबैको रोजाइ बन्ने गरेको छ । 
आमपानी क्षेत्रमा घुम्न जाने आन्तरिक पर्यटकहरू विभिन्न खानेकुरा लिएर खाने र डस्टबिन नभएका कारण फोहोर जथाभावी फालिने गरिएको थियो । लम्की जेसीजले त्यहाँ फालिएका फोहोरहरू टिपेर व्यवस्थापन गर्नुका साथै डस्टबिन राखेर आगामी दिनहरूमा पिकनिक खान जानेहरूले फोहोर डस्टबिनमा फाल्न सहज हुने भएको छ । आमपानी पर्यटकीय क्षेत्र सरसफाइसँगै डस्टबिन राखिएको हो । 
लम्की जेसीज वर्ष २०२१ का अध्यक्ष घनश्याम डांगीको सभापतित्वमा भएको कार्यक्रमका प्रमुख अतिथि सुदुरपश्चिम प्रदेशसभाका सांसद रतन बहादुर थापा रहेका थिए । अतिथिमा समाजसेवी दल बहादुर बिष्ट , लम्की जेसीजका संस्थापक अध्यक्ष सिनेटर हेमन्त कुमार बस्नेत , नेपाल जेसीका पुर्व राष्ट्रिय उपाध्यक्ष रामबहादुर बोगटी , लम्की जेसीजका पुर्व अध्यक्ष तथा कानुनी सल्लाहकार मोहनराज ढुंगाना , महासचिव रज बहादुर थापा , लम्की जेसीजका स्वास्थ्य संयोजक भरतराज खनाल , शाखा सम्पादक कल्पना तिमिल्सेना , लम्की जेसीजका उपाध्यक्ष ममता रावल , बसन्ती बलामी मगर , तालिम संयोजक नेत्रप्रसाद जैसी लगायत विभिन्न व्यक्तित्वहरूको सहभागीता रहेको थियो । करिब १० डरमभन्दा बढी फोहोर संकलन गरेर व्यवस्थापन गरिएको छ । 
कार्यक्रम बोल्दै प्रदेश सांसद थापाले आमपानी क्षेत्रको विकासका लागि आफू लागिरहेको बताएका छन्। सांसद थापाले आजको आवश्यकता सरसफाइ भएकाले युवाहरू मिलेर सरसफाइ गरेकोमा प्रशंसा गरेका थिए । सकेसम्म फोहोर नगर्नु नै राम्रो हुने समेत सांसद थापाले बताए । 
लम्की जेसीज वर्ष २०२१ का अध्यक्ष घनश्याम डांगीले सरसफाइ नै समाजको पहिलो आवश्यकता भएकाले लम्की जेसीजले सरसफाइसँगै डस्टबिन राखेको बताए । आगामी दिनहरूमा सबैले डस्टबिनमा फोहोर फाल्नुपर्ने र फोहोरको व्यवस्थापनका लागि सम्बन्धित पक्षले ध्यान दिनुपर्ने उल्लेख गरेका छन् । 
लम्की जेसीज वर्ष २०२१ को आयोजनामा आमपानी पर्यटकीय क्षेत्र सरसफाइ गरिएको यो पहिलो पटक हो ।
मंगलवार, कार्तिक ११ गते २०८३
