नेपाली कांग्रेसको १४ औँ महाधिवेशनअन्तर्गत शुक्रबार हुने वडा अधिवेशनको सरगर्मी बढेको छ । निषेधाज्ञाकै बेला हुन लागेको तनहुँ जिल्लाका वडा अधिवेशनमा वडा सभापतिका आकांक्षी यतिबेला नेता कार्यकर्तासँग भेटघाटमा व्यस्त छन् । उम्मेद्वारहरूले सामाजिक सञ्जालमा समेत मत माग्न थालेका छन् । चिया पसल, चौतारी, चोकचोकमा वडा अधिवेशनको चर्चा चुलिएको छ । कसले कुन वडामा सभापति जित्छ भन्ने चासो र विश्लेषण हुन थालेको छ । शुक्रबार तनहुँ जिल्लाका १० स्थानीय तहको ८५ वडामा निर्वाचन हुनेछ । केन्द्रीय निर्वाचन समितिले तनहुँमा फणिन्द्र कोइरालालाई निर्वाचन अधिकृतको रुपमा खटाएको छ । सहायक मतदान अधिकृतमा डिएलए तनहुँका अध्यक्ष चन्द्रकान्त वाग्ले र प्राध्यापक केशवराज काफ्ले नियुक्त भएका छन् । सबै वडामा पनि निर्वाचन अधिकृत तोकिएको छ ।
मंगलवार, कार्तिक ११ गते २०८३
