स्वास्थ्य बीमा कार्यक्रमको समिक्षा तथा अभिमुखीकरण कार्यक्रम लम्कीचुहा नगरपालिकामा बुधबार सम्पन्न भएको छ । लम्कीचुहा नगरपालिका नगर कार्यपालिकाको कार्यालय स्वास्थ्य बीमा शाखा भल्का कैलालीको आयोजनामा सम्पन्न भएको हो । 
स्वास्थ्य बीमा कार्यक्रमको समिक्षा तथा अभिमुखीकरण कार्यक्रममा बोल्दै लम्कीचुहा नगरपालिकाका नगर प्रमुख महादेव बजगाईले लम्कीचुहा नगरपालिका स्वास्थ्य बीमा कार्यक्रमलाई सबै नागरिक समक्ष पुगाउन लम्कीचुहा नगरपालिका निरन्तर लागिरहेको बताएका छन् । लम्कीचुहा अस्पताल स्थापना गरेकै समयदेखि नै स्वास्थ्य बिमा लागू गरेकोले अहिलेसम्म २३ हजार नागरिकले अस्पतालबाट प्रत्यक्ष सेवा लिएका र जसमा १९ हजारले स्वास्थ्य बिमा मार्फत सेवा लिन सफल भएको बताउनुभयो । नगर प्रमुख बजगाईले स्वास्थ्य बीमालाई थप प्रभावकारी बनाउन अबको लक्ष्य भनेको विपन्न वर्ग समक्ष कसरी सेवा दिन सकिन्छ भन्ने विषयमा ध्यान केन्द्रित गरेको समेत बताउनुभयो । कार्यक्रममा लम्कीचुहा नगरपालिकाकी उप प्रमुख टीका थापाले लम्कीचुहा नगरपालिकाले कैलालीमा स्वास्थ्य बिमा सबैभन्दा पहिले लागू गरेको बताउनुभयो । स्वास्थ्य बीमा गरेपछि उपचारमा समस्या हुने गरेको र यसलाई सहज बनाउन बीमा समितिले विशेष ध्यान दिनुपर्ने बताएकी छन् । कार्यक्रममा स्वास्थ्य बीमा बोर्ड सुदुरपश्चिम प्रदेश संयोजक जनक बहादुर साउदले स्वास्थ्य बिमा गर्नुका फाइदा , कसरी सेवा लिने र कस्ता रोगहरू लाग्दा कसरी सेवा लिन सकिन्छ भन्ने विषयमा आफ्नो विषयमा सहभागी माझ प्रष्ट गर्नु भएको थियो । स्वास्थ्य बिमा सामाजिक साझेदारीमा आधारित कार्यक्रम भएको र सामाजिक सुरक्षाको कार्यक्रम भएको समेत संयोजक साउदले बताएका थिए । 
कार्यक्रममा सहभागीहरूले बीमा कार्यक्रमलाई प्रभावकारी बनाउन गाउँ , समाज सबै ठाउँमा पुग्नुपर्ने बताएका छन् । कार्यक्रममा लम्कीचुहाका जनप्रतिनिधि , सामाजिक अगुवा , सञ्चारकर्मी , स्वास्थ्यसँग आबद्ध व्यक्तित्वहरूको सहभागीता रहेको थियो । कार्यक्रमको सञ्चालन तथा सहजीकरण प्रेमबहादुर विकले गर्नु भएको थियो ।
मंगलवार, कार्तिक ११ गते २०८३
