कैलाली जिल्लाको लम्कीचुहा नगरपालिका वडा नम्बर १ भुरुवामा आज डेङ्गु रोग नियन्त्रण सम्बन्धि जनचेतनामुलक कार्यक्रमको आयोजना गरिएको छ । स्थानीय महिला स्वास्थ्य स्वयंसेवक हरिकला देवकोटाको नेतृत्वमा लम्कीचुहा नगरपालिका वडा नम्बर १ भुरुवामा रहेको मनकामना स्वास्थ्य आमा समुहको आयोजनामा जनचेतनामुलक कार्यक्रमको आयोजना गरिएको हो । 
महामारीको रुपमा फैलिरहेको डेङ्गु रोगको रोकथाम तथा नियन्त्रणका लागि लम्कीचुहा नगरपालिकाको वडा नम्बर १ भुरुवामा रहेको मनकामना स्वास्थ्य आमा समूहले सरसफाइ तथा लाम्खुट्टेका लार्भा नष्ट गर्ने उदेश्यले कार्यक्रमको आयोजना गरेको हो । विगतदेखि नै स्वास्थ्य सम्बन्धि सचेतना कार्यक्रम संचालन गर्दै आएको आमा समुहले पछिल्लो समय महामारीको रुपमा फैलिएको डेङ्गु रोग र यसको सर्ने माध्यम , लक्षण, रोकथाम र नियन्त्रणका बारेमा जनस्तरमा जानकारी दिने उदेश्यले जनचेतनामूलक कार्यक्रम थालेको मनकामना स्वास्थ्य आमा समुह भुरुवाका अध्यक्ष बिमला अधिकारीले जानकारी दिनु भएको छ । आज मंगलबार आमा समुहले विद्युतलाइन , भुरुवा , तिल्केनी टोलमा लामखुट्टेको लार्भा खोजी गरि नष्ट गर्नुका साथै जनचेतनामूलक कार्यक्रम संचालन गरेको महिला स्वास्थ्य स्वयंसेवक हरिकला देवकोटाले जानकारी दिनुभएको छ ।
मंगलवार, कार्तिक ११ गते २०८३
