नेपाल नेत्र ज्योति संघ गेटा आँखा अस्पताल , नेपाल बालबालिका सहायता कार्यक्रमको आयोजना , लम्कीचुहा नगरपालिका वडा नं ३ को समन्वयमा र लिटिल स्टार्स इभी जर्मनीको आर्थिक सहयोगमा ३ दिने निशुल्क आँखा शिविर मंगलबार सुरु भएको छ । २० ,२१ , २२ गते सञ्चालन हुनेछ भने करिब ७ लाख आर्थिक रकम लाग्नेछ । कैलालीको लम्कीचुहा नगरपालिका वडा नं ३ बल्चौरमा रहेको जीवनदीप प्राथमिक विद्यालयमा शिविर सञ्चालन गरिएको छ । 
लिटिल स्टार्स इभी जर्मनीका लागि नेपाल प्रमुख निर्देशक राजन दुलालको सभापतित्वमा भएको कार्यक्रमका प्रमुख अतिथि लम्कीचुहा नगरपालिकाकी नगर प्रमुख सुशिला शाही रहनु भएको थियो भने अतिथिमा लम्कीचुहा नगरपालिका वडा नं ३ का वडा अध्यक्ष लव बहादुर शाही , जीवनदीप प्राथमिक विद्यालयका प्रधानाध्यापक दिनेश चौधरी , बल्चौर स्वास्थ्य केन्द्र व्यवस्थापन समितिका अध्यक्ष नन्दाराम बादी , गेटा आँखा अस्पतालका प्रमुख डाक्टर सुरेशराज पन्त , जर्मनीबाट संस्थाको प्रतिनिधित्व गर्ने मोरीज हाना , लारा सिभुल्का , इलाका प्रहरी कार्यालय चिसापानीका प्रतिनिधि , समाजसेवी , बुद्धिजीवी , जनप्रतिनिधिहरूको सहभागीता रहेको थियो । 
कार्यक्रममा बोल्दै नगर प्रमुख शाहीले देखावटी गर्ने संस्थाहरू लम्कीचुहा नगरपालिकामा भित्रिन नदिने बताउनुभयो । शाहीले लिटिल स्टार्स इभी जर्मनी संस्थाले इमानदारीका साथ काम गरेको र यो संस्थालाई काम गर्ने संस्थाको रुपमा आफुले लिएको बताउनुभयो । मंगलबार पहिलोदिन करिब ५ सय जनाले सेवा लिएका छन् । 
आँखा शिविरमा आँखाको चेकजाँच तथा उपचार , अप्रेसन , चेकजाँच गरेपछि चस्मा समेत निशुल्क दिइएको छ । लिटिल स्टार्स इभी जर्मनी संस्थाले नेपालका विभिन्न जिल्लामा समाजिक क्षेत्रमा काम गर्दै आइरहेको छ । यस सम्बन्धी भिडियो हेर्न पलपल अनलाइन टिभी नामक युटुब च्यानलमा हेर्न सकिनेछ ।
मंगलवार, कार्तिक ११ गते २०८३
