मञ्जु रावलका आफ्न्तलाई भेट्न मुख्यमन्त्री कमल बहादुर शाह आज (शनिबार) घरमै पुगेका छन् । कैलालीको लम्कीचुहा नगरपालिका वडा नं ४ मा रहेको मृतक रावलको घरमा पुगेर मुख्यमन्त्री शाहले आफन्तको अवस्था बारे जानकारी लिनुका साथै घर परिवारलाई सान्त्वना समेत दिएका छन् ।
भेटमा मुख्यमन्त्री शाहले मञ्जु रावलको हत्यामा संग्लन दोषीहरूलाई कानुन अनुसारको कडा सजाय दिलाउनमा आफू प्रतिवद्ध रहेको बताए । मुख्यमन्त्री शाहले मृतक रावलका सन्तानका लागि सरकारका तर्फबाट र व्यक्तिगत रूपमा गर्न सकिने सहयोग गर्ने समेत बताएका छन् ।
३३ वर्षीय मञ्जु रावल जेठ २५ गते बेपत्ता भएकी थिइन् । उनका छोरा विवेक रावलले दिएको निवेदनको उपर प्रहरीले छानबिन गर्दै जादा असार १४ गते मञ्जुका कंकाल मोहन्याल गाउँपालिकामा फेला पारेको थियो ।
मञ्जुको हत्या गरिएको प्रहरीको अनुसन्धानबाट खुलेको थियो । हत्यामा संलग्न ४ जनालाई प्रहरीले पक्राउ गरिसकेको छ ।
