चन्द्र प्रसाद खनाल / लम्की पौष २८
नवोदय बचत तथा ऋण सहकारी संस्था लिमिटेडको २२ औं वार्षिक साधारणसभा कैलालीको लम्कीमा शनिबार सम्पन्न भएको छ । संस्थाका अध्यक्ष डिल्ली प्रसाद गड्तौलाको सभापतित्वमा भएको कार्यक्रमका प्रमुख अतिथि सुदूरपश्चिम प्रदेशका मुख्यमन्त्री कमल बहादुर शाह रहनु भएको थियो ।
कार्यक्रममा विशिष्ट अतिथिमा सुदूरपश्चिम प्रदेशसभा सदस्य टीका थापा , सुदूरपश्चिम प्रदेशका निवर्तमान मुख्य न्यायवक्ता कुलानन्द उपाध्याय , लम्कीचुहा नगरपालिका उप प्रमुख जुना चौधरी , लम्कीचुहा नगरपालिका वडा नं १ का वडा अध्यक्ष नेत्र प्रसाद खनाल , वडा नं ५ का वडा अध्यक्ष माया बिष्ट , राष्ट्रिय सहकारी बैंक सञ्चालक सदस्य शिवा थापा ,लम्कीचुहा उद्योग वाणिज्य संघका अध्यक्ष पदमराज चौलागाईं , विभिन्न सहकारी संस्थाका अध्यक्ष तथा प्रतिनिधिहरू , समाजसेवी , बुद्धिजीवी , संस्थाका शेयर धनीहरूको सहभागीता रहेको थियो ।
संस्थाका सञ्चालक समिति सदस्य मोति प्रसाद उपाध्यायको स्वागत मन्तव्यसँगै सुरु भएको कार्यक्रमको सञ्चालन संस्थाका सचिव गोरख बहादुर बटालाले गर्नु भएको थियो ।
संस्थाका सञ्चालक समितिका कोषाध्यक्ष देवकी कार्कीले कोषाध्यक्ष को प्रतिवेदन प्रस्तुत गर्नु भएको थियो । लेखा समितिको प्रतिवेदन लेखा संयोजक तिलक प्रसाद गड्तौलाले प्रस्तुत गर्नु भएको थियो ।
सहकारी संस्थाको कुल आम्दानी ३१ लाख ९६ हजार ८७.४३ , कुल खर्च २६ लाख २ सय ६६.४ , कर अघिको नाफा ५ लाख ५६ हजार ८ सय २०.९४ , खुद नाफा ४ लाख ९९ हजार ३ सय १७.४० रुपैया भएको छ । शेयर सदस्य संख्या ६ सय १२ जना रहेका छन् । संस्थाको शेयर पुजी ६१ लाख ७० हजार रहेको संस्थाका प्रबन्धक सुकदेव काफ्लेले पलपल अनलाइन मिडियालाई जानकारी दिनु भएको छ ।
उत्कृष्ट कर्मचारी झरना बुढा , असल ऋणी मिना चौधरी , संस्थापक सदस्य , जेष्ठ सदस्यलाई सम्मानपत्रले सम्मान गरिएको थियो ।
कार्यक्रम बोल्दै मुख्यमन्त्री शाहले सहकारीको नियमन , अनुगमन र सहकारीको विकासका लागि प्रदेश सरकार लाग्ने बताए । कार्यक्रममा बोल्ने वक्ताहरूले संस्था सहकारी संस्थाको सफलताको शुभकामना व्यक्त गरेका थिए ।
