कृष्ण थापा फागुन , १६ लम्की
कैलालीको लम्कीचुहा नगरपालिका वडा न.१ मा रहेको चुरे संरक्षण महिला बचत तथा ऋण सहकारी संस्थाले २९ जना सेयर सदस्यहरूलाई स्वरोजगार कर्जा लगानी गरेको छ । आर्थिक रूपमा विपन्न तथा व्यावसायिक कार्यमा संलग्न रहेका २९ जना सेयर सदस्यहरूलाई स्वरोजगार कर्जा लगानी गरेको हो ।
वार्षिक ५ प्रतिशत व्याजदरमा लगानी गरेको स्वरोजगार कर्जा मार्फत उत्कृष्ट व्यवसाय गर्न लम्कीचुहा नगरपालिका वडा न.१ का अध्यक्ष नेत्र प्रसाद खनालेले अनुरोध गरेका छन् । अध्यक्ष खनालले पछिल्लो समय सहकारी संस्थाहरूबाट ऋण लिने तर त्यो ऋण नतिर्ने प्रथाको विकास भएकोमा दुख व्यक्त गरेका छन् ।
चुरे संरक्षण महिला बचत तथा ऋण सहकारी संस्थाका अध्यक्ष चन्द्रादेवी महतराले सेयर सदस्यहरूले जुन प्रयोजनका लागि सहुलियत पूर्ण स्वरोजगार कर्जा लिएका छन् त्यसको त्यही रूपमा सदुपयोग गर्न अनुरोध गरेकी छन् । सहकारी संस्थाका व्यवस्थापक ज्ञानु बुडथापाले सहकारी संस्थाले सुदूरपश्चिम प्रदेश स्वरोजगार विकास कोषबाट ल्याएको ७८ लाख रकम २९ जना सेयर सदस्यहरूलाई वार्षिक ५ प्रतिशत व्यजदरमा लगानी गरेको बताएकी छन् ।
प्रदेश स्वरोजगार विकास कोषको मापदण्ड अनुसार ९ सय जना सेयर सदस्यहरू मध्येका २९ जना सेयर सदस्यहरूलाई सहुलियत पूर्ण स्वरोजगार कर्जा लगानी गरेको बताएकी छन् ।
चुरे संरक्षण महिला बचत तथा ऋण सहकारी संस्थाले आर्थिक रूपमा विपन्न महिलाहरूलाई सिलाइ बुनाई तालिम समेत सञ्चालन गरिरहेको छ ।
