सहकारीमा सुशासन : प्रविधि र एकीकरण सहकारी सञ्चालन तथा व्यवस्थापन सम्बन्धी तालिम शुक्रबारदेखि सुरु भएको छ । असार १४,१५ र १६ गते ३ दिनसम्म तालिम सञ्चालन हुनेछ । जिल्ला बचत तथा ऋण सहकारी संघ लिमिटेड धनगढी कैलालीको आयोजनामा र सुदूरपश्चिम प्रदेश सरकार भुमि व्यवस्था कृषि तथा सहकारी मन्त्रालय सहकारी रजिस्ट्रार तथा प्रशिक्षण कार्यालय धनगढी कैलालीको सहयोगमा कार्यक्रम सुरु भएको हो ।
जिल्ला बचत तथा ऋण सहकारी संघ लिमिटेड कैलालीकी अध्यक्ष शिवा थापाको सभापतित्वमा सुरु भएको कार्यक्रमका प्रमुख अतिथि लम्कीचुहा नगरपालिका उपप्रमुख जुना चौधरी रहनु भएको थियो ।
कार्यक्रमका विशिष्ट अतिथि लम्कीचुहा नगरपालिका वडा नं १ का वडा अध्यक्ष नेत्र प्रसाद खनाल रहेका थिए । कार्यक्रममा केन्द्रीय बहुउद्देश्यीय सहकारी संस्थाका केन्द्रीय सदस्य तथा किसान बहुउद्देश्यीय सहकारी संस्थाका अध्यक्ष सुरेन्द्र कुमार शाह , जिल्ला सहकारी संघका लेखा सदस्य बुद्धि प्रसाद खनाल , सिएमसी कैलालीका अध्यक्ष लालबहादुर भण्डारी , उपाध्यक्ष नवराज न्यौपाने , नेफस्सुनका अनुगमन अधिकृत एवम् प्रशिक्षक पवनजंग मल्ल लगायत सहकारीका प्रमुख तथा प्रतिनिधिहरूको सहभागीता रहेको थियो ।
जिल्ला बचत तथा ऋण सहकारी संघका सदस्य सुरेन्द्र बडुवालको स्वागत मन्तव्यसँगै सुरु भएको कार्यक्रमको सञ्चालन चन्द्रकान्त खनालले गरेका थिए । तालिममा १७ वटा सहकारीबाट ३३ जनाको सहभागीता रहेको छ ।
कार्यक्रममा बोल्ने वक्ताहरूले तालिम फलदायी र राम्रो हुने भन्दै जिल्ला बचत तथा ऋण सहकारी संघले तालिमको आयोजना गरेर राम्रो गरेको बताएका छन् ।
पछिल्लो समयमा सहकारीप्रति हेर्ने दृष्टिकोणलाई समेत यस तालिमले महत्त्वपूर्ण भुमिका खेल्ने बताएका छन् ।
