बादी समुदायका मुलभुत सवालहरूमा प्रदेशसभा सामाजिक विकास समिति र सरोकारवालाहरूबीच सोमबार लम्कीको बल्चौरमा सार्वजनिक सुनुवाइ भएको छ । सञ्चार प्रतिष्ठान नेपाल, कैलालीको आयोजना र सामाजिक विकास समिति तथा संसद सहयोग परियोजनाको समन्वय र सहकार्यमा सार्वजनिक सुनुवाइ भएको हो ।
कार्यक्रममा प्रदेशसभा सदस्यहरु धर्मराज पाठक, जानकी पौडेल कुँवर र तुलसी देवकोटा, पुर्व प्रदेश सांसद उमादेवी बादी र लम्कीचुहा नगरपालिका वडा नम्बर ३ का वडा अध्यक्ष लव बहादुर शाहीले बादी समुदायका सवालहरुबारे धारणा व्यक्त गर्नुभएको थियो ।
कार्यक्रममा सुदूरपश्चिम बादी उत्थान समाजका अध्यक्ष रमा देवी बादी, सचिव नन्दराम बादी, सञ्चारकर्मी रमेश बादी लगायतले बादी समुदायको अवस्था र समस्याबारे धारणा व्यक्त गर्नुभएको थियो ।
कार्यक्रममा सहभागीहरुले प्रदेशसभा सामाजिक विकास समिति समक्ष बादी बस्तीको समस्या र सरकारले गर्नुपर्ने कामबारे जानकारी गराएका थिए । सहभागीहरुले बादी बस्तीमा सुकेका खडा रुखहरूका कारण सधै जोखिम रहेको, आर्थिक विपन्नताका कारण बालबालिका पढाईबाट बन्चित भएको, रोजगारीको अभावमा अहिले पनि मागेर गुजारा गर्नुपर्ने अवस्था रहेको बारे गुनासो गरेका थिए ।
प्रदेश सभा सदस्यहरुले बादी समुदायका सवालहरुमा गम्भीरतापूर्वक समिति र प्रदेश सभामा कुरा उठाउने प्रतिवद्धता व्यक्त गरेका थिए ।
कार्यक्रमको सञ्चालन र सहजीकरण पत्रकार मनमोहन स्वारले गरेका थिए ।
